Serviciu de Normalización Llingüística del Conceyu Candamu

¿QUÉ SOMOS?
El Serviciu de Normalización Llingüística del Conceyu Candamu yá l'organismu encargáu de garantizar l'usu del asturianu como llingua vehicular en cualquier tipu de comunicación pública ou privada ente las alministraciones públicas del Conceyu ya la sou ciudadanía, na mayor parte los casos falante d'esti idioma; ya, tamién, d'afalagar el sou usu ente distintos sectores del conceyu: hostelería, comerciu, educación... porque, a la fin, esta yá la única midida que pue garantizar la pervivencia del nuesu patrimoniu, la sou presencia como forma de comunicación viva ya plena.

¿QUÉ FAEMOS?
Dalgunos de los puntos fundamentales dientro las responsabilidaes del Serviciu de Normalización Llingüística son:

Ser parte activa del procesu de normalización toponímica, dar a conocer la nuesa toponimia ya garantizar ente la xente'l sou usu, porque, a la fin, esto siempre foi lo que se dixo, anque nun se respetara hasta'l momentu, ya yá lo tradicional, lo auténtico; pa faelo, vamos dir renovando las señales hasta garantizar la sou presencia en tolos carteles de carreteras, mapas ya documentos públicos de cualquier clas.
Traducir tolos documentos públicos ya privaos con repercusión nel Conceyu ya garantizar el bilingüismu equilibráu na alministración pública.
Garantizar la presencia institucional del asturianu nel Conceyu, dende retulación hasta publicidá...
Faer del asturianu un componente tresversal dientro de los distintos aspectos que xestiona un Conceyu.
Faer campañas ente distintos sectores de la población pa promover l'usu del asturianu ente los mesmos: empresas hosteleras, comerciantes, asociaciones... ya ciudadanía en xeneral.
Informar ya tramitar las subvenciones qu'en relación al usu del asturianu saca cada añu la Conseyería de Cultura.
Dignificar l'usu del asturianu hasta acabar cola diglosia.
Esti yá a grandes rasgos el faer d'un serviciu de normalización llingüística, l'ambición yá grande ya l'oxectivu lexítimu, anque non siempre fácil, poner al asturianu como llingua de la población asturiana na situación que merez, la que lu equipara como llingua d'usu al español (col que convive n'Asturias) ya non la que lu fai subsidiariu del mesmu, porque son idiomas del mesmu valir, colo que nun tien munchu sentíu l'arrequeixamientu, la marxinación ya la persecución que sufre'l primeiru. La llingua asturiana yá'l bien cultural más importante que tenemos ya la sou perda sedría un mal irreparable.

¿ÓU TAMOS?
Cualquier asociación ou particular que quiera pue ponese en contactu col serviciu, bien llamando por teléfonu, bien por corréu lletrónicu ou bien en persona, pasando pol Conceyu en Grullos
Conceyu Candamu
Barriu El Campu, 27
33829 Candamu (Asturias)

CONTACTU
 Teléfonu: 985 828 056
Corréu lletrónicu:  llingua@candamo.es

HORARIU
Llunes ya vienres:

De 9:30 a 13:00 h.

Pues topanos tamién nel nuesu Facebook:

https://www.facebook.com/grauyacandamu

El nome tradicional de los nuesos pueblos yá oficial:

http://movil.asturias.es/Asturias/descargas/toponimia/Candamu.pdf