Dende'l Conceyu Candamu siguimos esmolecíos por llograr la conectividá nel nuesu conceyu dende distintas actuaciones: amás de tar incluyíos nel PLAN PEBA (Plan d'Estensión de Banda Ancha) qu'implica dotar de freba óptica al 75% de la población a lo llargo'l 2020, ya'l accesu pal 25% restante nel 2021, tamén esiste collaboración con SESTAFERIA.NET, empresa que ta faendo actuaciones de despliegue de conectividá en Candamu.

Nesti sen, César Díez, representante de la empresa, infórmanos que, col envís de facilitar l'accesu a internet nel Conceyu, tan necesariu estos días, amás de los repetidores de Pandiellas ya FenolledaTDT, habilitóuse un repetidor en San Tisu, col oxetivu d'enanchar la cobertoria na zona. Con esti nuevu repetidor, los pueblos beneficiaos sedrían Santusesu, Espinosa, Beifar, Valdemora ya San Román.

Recuérdanos que fai falta visión directa, ensin torgas, a esos lugares. Aquellos vecinos interesaos puen consultar la cobertoria en cobertura@sestaferia.net, unviando el sou allugamientu exactu (necesitan coordenadas, ou enllaz vía google maps), indicando pueblu ya númberu de la casa.

Sestaferia ya'l Conceyu Candamu siguen trabayando pa facilitar la cobertoria nel Conceyu.