Si la cueva de La Peña deu renome universal al conceyu de Candamu, outro tanto se puede dicir de las sous fresas. Que l'escritor Juan Antonio Cabezas llamara a Candamu l'Aranjuez d'Asturias, tien tol significáu d'una denominación d'alta calidá pa esti ricu frutu. A esta calidá única súmase'l sabor inigualable, siendo, ensin duda, el productu gastronómicu más emblemáticu del conceyu, hasta'l puntu de cuntar con un Festival qu'añalmente se celebra a primeiros de xuniu.

Non solo las fresas de Candamu gozan de fama reconocida, tamién tola fruta que se collecha nel sou territoriu yá apreciada: mazanas, peras, nisos, ciruelas ya -ente los frutos secos- la castaña, a la que los vecinos d'Aces dedican un festival en noviembre. Yera importante antiguamente la producción d'uva, siendo famosos los vinos candaminos. De merecíu prestixu gozan igualmente eiquí las verduras, de collecha más temprana que n'outras zonas d'Asturias.

Nun faltan los queisos en Candamu, porque eiquí sigue produciéndose, al igual que nos conceyos de la redolada, el notable queisu d'afuega'l pitu, na sou variedá blanca. Yá esti un queisu fechu esclusivamente con lleche de vaca, llixeramente blandu según el tiempu de curación, que tien, sicasí, una consistencia firme, presentándose n'unidades en firma de troncu de conu.

Escelente carne, sabrosos callos ya embutíos deliciosos -too ello del país- pueden degustase nos bares ya restaurantes del conceyu.

Como final, nun podemos esqueicer los pexes, especialidá importante de dalgunos reputaos fogones.