Cueva de La Peña - ayto-candamo
Paleolíticu. Cueva de La Peña de Candamu
La Cueva de Candamu ou la Caverna de la Peña de Candamu ta situada nel conceyu asturiano de Candamu nel llugar de San Román. Dende xiliu de 2008 ta incluida na llista del Patrimoniu de la Humanidá de la Unesco
Descubrimientu ya investigación:
Conocida dende antiguo polos habitantes de la zona, el descubrimientu científicu foi en 1914 cuando Eduardo Hernández Pacheco (catedráticu de Xeología de la Universidad Complutense de MAdrid) identifica la existencia de pinturas ya grabaos. Cuasi simultáneamente, el Conde de La Vega del Sella (importante prehestoriador asturianu) reconoz el fuexu identificando'l sou arte. Tres un intercambéu d'informaciones ente dambos, foi'l primeiru d'ellos el que s'encargóu de la sou investigación ya de la publicación del arte en 1919, constituyendo una de las más completas monografías publicadas sobre l'arte paleolíticu del área cantábrica.
La importancia del sou arte foi rápidamente reconocida ya motivóu la declaración de Monumentu Nacional en 1942. Acondicionada pa la visita pública ya sin un control efectivu sobre la mesma, el tratu recibíu polos grabaos ya las pinturas deu nun gravísimu deterioru qu'obligóu, en 1980, al pieslle de la cueva ya a la realización d'estudios centraos na conservación ay recuperación medioambiental del fuexu. Tres más d'una década de repousu ya recuperación del equilibriu internu, la cueva foi reabierta al públicu a finales de los años 90 del pasáu sieglu.
Descripción de la cueva
La cueva ta nel cursu baxu del ríu Nalón, mui cerca de la sou desembocadura, ya constitúi la furaca con arte paleolíticu más occidental del continente européu.
Ábrese na base d'una llomba caliza, conocida como La Peña, ya presenta una planta d'unos 70 m de lllagor. L'accesu faise al traviés d'una pequeña sala agrandada artificialmente pa la recepción de los visitantes que comunica con una galería na que na sou parte drecha, ya a una cota inferior, alcuéntrase una pequeña sala onde nel techu se conservan dellas representaciones de carácter esquemáticu en coloráu (Sala de los Signos Coloraos). Esta galería conduz hacia l'espaciu ou sala principal de la fuexa onde ta la práctica totalidá del conxuntu artísticu de la cueva (Salón de los Grabaos). Esta sala, que sorprende tanto pola sou amplitú como pola sou altura, alcuéntrase delimitada perimetralmente por un conxuntu d'imponentes formaciones xeológicas (columnas, coladas ya concreciones estalagmíticas). Nún de los sous estremos ábrese una pequeña sala (Galería de las Batiscias), denominada así pola abondancia d'insectos cavernarios presentes na mesma; tradicionalmente indicábase l'ausencia de representaciones paleolíticas na mesma, pero investigaciones recientes apuntan a la existencia d'un pequeñu conteníu gráficu.
Cronoloxía artística:
Pinturas correspondientes a los periodos Solutrense ya Magdaleniense.
Horarios:
La Cueva La Peña va tar abierta al públicu nas datas qu'apaecen darréu:
SELMANA SANTA: del 2 al 12 d'abril (PESLLADA LLUNES 6 D'ABRIL)
BRANU: del 16 de xunu al 20 setiembre 2020 (PESLLADA los LLUNES)
TURNOS DE VISITAS: 11:00, 12:00 YA 13:00 HORAS
Cupu diariu de 45 personas (15 por turnu)
La entrada ta reservada pa mayores de 7 años
IMPRESCINDIBLE FACER RESERVA PREVIA
INFORMACIÓN YA RESERVAS: Tfnu. +(34) 985 82 80 56 - 985 82 82 28
(De llunes a vienres, de 09:00 a 14:00 horas)
AVISU IMPORTANTE:
Enantes de la visita a la Cueva tien de dise al CENTRU D'INTERPRETACIÓN DE LA CAVERNA, allugáu nel PALACIU VALDÉS- BAZÁN de SAN ROMÁN DE CANDAMU, au s'ufiertan visitas guiadas cada hora, enantes de las programadas pa la Cueva.
Normas d'accesu La Caverna La Peña de Candamu
Habrán siguise rigorosamente las normas ya indicaciones de la guarda-guía.
En casu d'incumplimientu o de nun tar en condiciones físicas pal accesu, la guarda-guía ta acreitada p'anular la reserva
Nun se permite la entrada a menores de 7 años
Alviértese que p'acceder a la cueva ye necesario calzáu afayadizu ya ropa d'abrigu, yá que yá preciso xubir ya baxar un pasu estrenchu con escalones, baxu allumáu ya terrén nidiu
Nel interior de la cueva:
- Nun tocar nada
- Nun sacar semeyas, vídeos ou grabaciones
- Nun usar el móvil, llinternas ou punteros láser
Nun se pue acceder:
- con comida, bébora, animales, plantas, mochilas, bolsos, palos, cayaos, muletas, chanclas, sandalias, zapatos de tacón, etc.
Gracias pola sou collaboración
CARTEL CUEVA LA PEÑA 2019_ASTURIANU
CARTEL CUEVA LA PEÑA 2019_ESPAÑOL
CARTEL CUEVA LA PEÑA 2019_INGLÉS
CARTEL CUEVA LA PEÑA 2019_FRANCÉS
INFO CUEVA LA PEÑA_CENTRU D'INTERPRETACIÓN 2019
Accesu:
Na carretera de Grullos a Pinullán (AS-236), ente los quilómetros 4 ay 5 ta San Román, dende onde sal una pequeña carretera que lleva hasta l'aparcamientu de cerca de la cueva.