Candamu, bien definíu xeográficamente por dous cordales paralelos, con llugares situaos nas suaves gradientes ya nel estrechu valle central vertebráu pol ríu Nalón, presenta indicios de colonización humana dende la más remota antigüedá.

El nuesu agradecimientu a Francisco Javier Fernández Conde

La sou situación como territoriu de pasu ente'l mar ya la meseta fai al conceyu de Candamu ser mui bonu pa los asentamientos poblacionales, ya los curtios interfluvios, espléndidos pa la pación ya los cultivos. 

La conocida Cueva de la Peña de Candamu (San Román), verdadeiru finxu central del territoriu, del Paleolíticu Superior (35.000-9.000 años antes de Cristu), constitúi la primer noticia documentada sobre la presencia humana nel ámbitu del futuru conceyu, al mesmu tiempu qu'una riqueza patrimonial de valor inestimable. La Época de los metales tamién deixóu restos reconocibles como'l famosu brazalete de Llameiru, del Bronce final (1.110-1.000, aprox. ant. Cristu). La llarga etapa del Neoliticu cunta tamién con una serie de construcciones tumulares, relacionadas polo xeneral con cresterías que faen de divisoria frente a outros territorios 'futuros conceyos' vecinos. 

Alcuéntranse estos monumentos funerarios, indiciu inequívocu de creencias nel más allá ya símbolos al mesmu tiempu de poderes locales protohestóricos, en Valdemora ya Ventosa; ya tamién na panorámica sierra de Sollera: verdadeiru murallón separador de las dous grandes cuencas fluviales asturianas: la del Nalón ya la del Narcea, nos sous tramos finales. La Edá del Fierru ou Época Castreña (a partir del 800/700 ant. Cristu), ta bien representada. Dellos pueblos d'altura tuvieron que ver con emplazamientos castreños, característicos de los sieglos de la cultura del fierru, ente los que destacan los de Praúa, La Mortera, Ventosa 'mencionáu nun documentu del sieglu xi', Villar (Murias), El Cogollu (Cueru) ya outru del mesmu nome en Valdemora. La presencia ya'l dominiu de Roma foi escasu porque las tierras candaminas nun tenían los minerales que querían los poderes romanos, como l'ouru ya la plata. El nome del territoriu, Candamu, podría ser la denominación indíxena de Xúpiter, la divinidá central del panteón romanu, anque non tolos investigadores tán d'acuerdu con esta etimoloxía. 

Los sieglos v-x, llamaos 'sieglos escuros' n'outras llatitudes, tamién lo son na hestoria de Candamu. Nun existe nenguna documentación escrita ya namás disponemos d'unos pocos resclavos derivaos de la toponimia prerromana ou romana, considerada por muchos investigadores como 'guapa ya persistente memoria del paisaxe'. El nome de dellas parcelas actuales paez remitise a esi tractu hestóricu de mediu millar d'años.

Na redolada del añu 1.000, ya dalgo antes, empiezan a notase indicios d'hestoria ya cultura medievales nun paisaxe de llugarinos 'la Edá Media ye un mundu de pueblinos', dalgunas de las cuales cuntan yá con fisonomía propia. Los dous primeiros núcleos bien documentaos son San Tisu ya Candamín, dambos equidistantes ya cercanos a la Cueva de la Peña. 

Los oríxenes del primeiru d'ellos, San Tisu, tán recoyíos nel Llibru Becerru de Courias, la colección documental del monesteriu más importante del país astur nel sieglo xi, San Xuan de Courias, cerca de la villa de Cangas del Narcea. Según esti testu, nel llugar de San Tisu llevantábase'l solar d'un tal Leminiu ou Liminiu, poderosu terrateniente del sieglu vii-viii ya contemporaneu del rei de Pravia Silu (774-783). Ellí establez una 'ilesia ou monesteriu familiar' con un imponente patrimoniu. Yera miembru d'una poderosa familia noble, de la que saldrán dous bispos d'Uviéu "Ovecu (913-951) ya Bermudu (971/975-991"' ya a la que pertenecen tamién los condes Piñolu Ximeni ya Aldonza Ordóniz, los fundadores del mencionáu cenobiu Couriense en 1044. Por esu, una parte importante del patrimoniu San Tisu va pasar al de Courias depués de constituíse. En realidá, Leminiu tien tolas características d'esos xefes locales de territorios concretos, qu'antes de la invasión musulamana ou depués de producise esta (711-22), fonon capaces de plantar cara al Islam nel monte Auseva ya más tarde n'Olalíes (Proaza). 

L'outru nucleu bien documentáu, Candamín 'resume ou compendiu del topónimu mayor', n'estrecha relación con San Román-San Pedru Mangón, El Valle ya Santiagu d'Aces, introduznos na hestoria medieval del futuru conceyu ya cunta yá con documentación mui espresiva p'aquella época. Esta última ilesia, por exemplu, lleva'l títulu de "monesteriu" nun Testamentum del 1006. En 1074, un conde llamáu Muniu Gundisálviz dona al monesteriu uvieín de San Vicente, la ilesia de San Pedru "nel valle de Candamu xunto al palaciu del rei, xunto al ríu Nalón". Trátase de San Pedru Mangón.    

Ya'l "palaciu del rei", con una situación exacta a un poucu al norte d'esta ilesia, pue establecese con asombrosa exactitú, gracias a dellos topónimos menores facilitaos pol propiu documentu, ya que perviven tovía. El 'palaciu del rei' nun yera más que la residencia d'un noble, el propiu Muniu seguramente, que representaba la xusticia ya l'autoridá d'outru personaxe situado más enriba na escala social ya n'última instancia la del propiu soberanu lleonés.

Tamién ta bien documentada la existencia de munchos señores, llaicos ya eclesiásticos nel Medioevu de Candamu. Tovía ye posible asitiar con bastante precisión l'emplazamientu de dellas fortalezas ou casas fuerte nos márxenes del Nalón: la de Cueru, güei desaparecida, menos el nome ya'l recuerdu na memoria de dalgún testigu escepcional; la de Murias, cerca de la desembocadura del Dele nel mesmu Nalón; la del Valle; ya, finalmente, la de San Román, con unos restos imponentes del sieglu xvi evidencian la potencia de los sous titulares. Los monasterios de San Xuan de Courias, Santa María de Balmonte ya San Vicente d'Uviéu representan la outra nobleza, la eclesiástica, que s'esforzóu tamién por garantizase un espaciu de dominiu ya de poder nel ricu ya estratéxicu valle del baxu Nalón.

Los llugares que s'asoman poucu a poucu al conxuntu documental de la Edá Media llevan normalmente'l nome de villa ou llugar ya los términos utilizaos polo xeneral pa designar tola demarcación territorial avezan ser los de valle, tierra ou alfoz, esti últimu, términu técnicu equivalente a conceyu. Pero Candamu nun foi conceyu en sentíu formal hasta'l sieglu xix, 1803, 1835. Antes dependiera de Gozón, Pravia ya Grau, sucesivamente.

Las estructuras sociales ya económicas de Candamu nun se diferencian de las características d'outros conceyos de valle nas Asturias centrales ya cerca de la marina. El caseríu de los pueblos colos sous barrios, polo xeneral concentráu, namás n'ocasiones presenta una fisonomía dispersa. Igual El Valle responda escepcionalmente a esta forma. Y el terrazgu, llugar de trabayu, distribuíase ente l'agricultura "tierras a pan ou trigu rústicu (espelta>escanda) ya outru tipu de cereales más probes como'l miyu, el centén ou la cebada; el maíz n'épocas modernas" ya a frutales. Las parcelas d'orientación ganadera tamién podían tener árboles frutales. La rixidez morfolóxica d'estos espacios dedicaos a la agricultura-ganadería, la organización ya ubicación ya los modos d'esplotación dependían d'un modelu mui xeneralizáu n'Asturias, repetíu casi miméticamente. Tovía resulta fácil alcontrar los nomes del parcelariu tradicional "llosu ou llosa, ería, guetu, güerta, xenra... mortera (La Mortera)", de raigame claramente medieval, pero con conteníos reales mui diferentes. Por outra parte, la invasión de las segundas viviendas de nueva planta ou con restauraciones nada afortunadas de las antiguas, na mayoría de los casos tán desfigurando con escesiva rapidez el panorama tradicional de muchos pueblos, sin mencionar las construcciones de bloques de viviendas ou xalés de facturas aberrantes ya colores tan novedosos como desafortunaos en muchas ocasiones.

La producción de ciruelas claudias, la fresa, las mazanas ou las castañas considérase como la más característica ya valiosa de Candamu. Sin negar eso, sería inxusto olvidar la potencia ya la calidá de la producción vitivinícola. La toponimia tradicional ye tovía mui elocuente. Cerca del caseríu existen parcelas con nomes significativos: La Viña (San Tisu) ya La Viñuca, La Mortera. Ya nesti mesmu términu, cerca de La Cava, pue alcontrase El Viñéu. N'ocasiones, la esplotación vitiviniícola llevábase a cabu nuna parcela grande por dellos llabradores ou familias. D'ehí'l nome de Las Viñas, La Folguera (El Valle). Y tamén pueden alcontrarse topónimos similares cerca d'El Camín del Requeixu, a la vera d'Espinosa (Fenoeda), ou en Ventosa, al llau de la ilesia parroquial. Un terciu aproximáu del espaciu de cultivu d'Espinosa llamábase La Viñaca. La Viñona ye una era de notables proporciones cerca de Santusesu (Fenoeda). Ya podían multiplicase los exemplos. La ilesia parroquial de Santa María d'El Valle conserva la imaxe de la patrona celestial con un recimu d'uvas na manu ya reconozse popularmente como La Virxe de La Viña. Las Parrucas da nome a un llugarín de San Román, dependiente eclesiásticamente de Valdemora. Esto fai pensar que muchas de las pomaradas actuales fonon plantadas sobre tierras de viñéu.

Llabrar viñeos foi mui importante en Candamu hasta'l sieglu xix, polo menos según el testimoniu de J. Madoz nel sou Diccionario geográfico-estadístico-histórico, Madrid, 1845-1850. Ya siguía tovía nel xx. L'añu 1929, Francisco Menéndez, personalidá destacada de San Román, ganaba la Medalla de Plata d'Asturias pola calidá de los vinos del conceyu que producía nas sous propias tierras. En casa d'él consérvase tovía un instrumental, mui modernu pal sou tiempu, relacionáu con esta clase de producción. Dende fai diez años, M. Ángel López de Santusesu embarcóuse, al paecer con éxitu, na empresa de la viticultura.

Nestos "tiempos duros" de crisis, cuando'l monte baxu, el viescu, amenaza con tragar tierras ya praderías cultivadas ya llenas d'espléndidos árboles frutales hasta hai poucu tiempu, la vuelta a esti tipu de renovación ya recuperación agrícola constituiría seguramente una bona alternativa pa una población sumida en grave procesu de recesión acelerada. La renovación económica propiciaría tamién la demográfica a base de foráneos que podrían recalar en Candamu atraíos por una agricultura creciente.