Empezamos en Grullos una ruta porl norte del conceyu, que va rematar nel área recreativa de La Degollada, nel corazón de la Sierra del Pedrouzu.

Partiendo de la capital pola carretera AS-237, en dirección a Avilés, ente los quilómetros ocho ya nueve una esviación a la esquierda acércanos a Villanueva, pueblu de la parroquia d'El Valle, recostáu nun pequeñu promontoriu sobre'l regatu de Candamín.

Sigue la estrecha carretera hasta El Valle, onde ta la ilesia de Santa María, paecida en cuanto a estructura ya época a tolas qu'alcontramos en tol conceyu. Edificada nel sieglu XVIII, destaca la sou espadaña de tres arcos, dous ximielgos nel primer cuerpu ya unu nel superior, adornáu esti con bolas ya cola curiosidá d'albergar una interesante imaxe de la Virxe, de la mesma época que la ilesia; la portada yá d'arcu de mediu puntu ya l'ábside, cuadráu con cornisa sobre caneciellos, probablemente pertenecéu a una construcción anterior.

Bon llugar, la sou rodiada, pa recreanos cola belleza del panorama que dende ellí s'observa, nun ambiente plenu d'encantu rural; encantu que va aumentar si por un camín asfaltáu que parte d'al llau de la ilesia, acercámonos a la pequeña aldea de Ribulouru, nuna subida na que nun faltan las vieyas castañales na arba'l camín.

Dende El Valle sigue la carretera -por Las Canales- hasta San Román, pero la nuesa ruta va faenos volver al cruz cola AS-237 pa, en dirección Avilés, entrar na parroquia de Llameiru, alcontrando a Llameiru como primer pueblu.

Nel marxe drechu de la carretera ta la sou ilesia parroquial, consagrada a Santa Olaya. Trátase de un guapu templu de considerables proporciones, de nave única cubierta con bóveda de mediu cañón; la fachada ta rematada por una torre -campanariu, lo que la aparta de los modelos de la comarca, casi toos ellos con espadaña.

El conxuntu, con ábside ya pórticu, paez remontase al siegl XVII, anque sufríu posteriores modificaciones, las últimas después de la Guerra Civil. Guarda dientro, ocupando la capiya de la Concepción, un interesante sepulcru nel que ta enterráu Alonso González de Llamero, militar que vivíu en sieglu XVII, sirviendo en Flandes, Bretaña ya Italia, onde consiguíu'l grau de Teniente Xeneral del Mar. Foi Alonso miembru de la familia González de Llamero, con casa solariega conocida güei como Casa de los Fernandones -con blasón na fachada- nel barriu de La Viña.

Tamién naciéu en Llameiru'l fundador de la ciudá americana d'Alburquerque, del Estáu de Nuevu Méxicu, Francisco Cuervo y Valdés, del que queda memoria perpetuada na figura escultórica situada nuna de las cais de dicha ciudá.

Dende Llameiru hai una curtia pero preciosa ruta que nos lleva al pueblu d'El Monte Llameiru. El camín ta asfaltáu, pero va ser más gratificante un paséu a pie. Saliendo de la ilesia báxase hasta'l barriu d'El Ríu, onde se cruzan las auguas del Dele. Hai que siguir la carretera pola falda de la Sierra del Pedrouzu, hasta las últimas casas d'El Monte, terminando eiquí'l camín asfaltáu. Una guapa ya nueva perspectiva del conceyu ofrézsenos a lo llargo de tol trayectu.

Mui cerca de Llameiru, pola carretera AS-237, alcuéntrase Ferreiros, llugar onde vamos visitar el Palaciu de los Cuervo, na actualidá conocíu como Casa de Carvajal. De grandes proporciones, forma'l Palacio un bonconxuntu, con capiya, palombar ya una espectacular panera de doce pegollos, too ello alredor del patiu central. Naa paré de la casa apaez l'escudu de los seis cuervos, que fai referencia a l'antigua familia.

A partir de Ferreiros entramos na parroquia de Ventosa. Lo primeiro qu'agora alcontramos -al que s'accede por una esviación a la drecha- yá Faces; nél podemos contemplar munchos horros ya dalgún balcón curiosu con interesantes torneaos tradicionales de madera.

Yá Ventosa, pueblu altu ya bien soleyeiru, con abundantes ya cuidadas tierras de llabor que paecen esguilar pola llomba. Antiguamente tuvienon fama los sous ferreiros, de quien fala Ramón Prieto Bances nel sou llibru La Jurisdicción Concejil de Candamo. Cuntóu Ventosa -n'época medieval- con un hospital de lleprosos, denomináu na época "Malatería de Los Corros", con ermita que funcionóu hasta finales del siegl XVIII, época na que foi sustituida pola actual iglesia parroquial, dedicada a San Xuan, que repite esquemas conocíos, con nave única cubierta de madera ya coru altu a los pías, ábside cuadráu, pórticu ya espadaña.

D'ente las casas de Ventosa parte una carretera asfaltada que, ente tierras de llabranza, conduz al pequeñu ya altu pueblu de La Mafalla; dende él, en días claros, puede vese una espléndida vista del litoral cantábricu.

Hai en puebli una deliciosa capiliya -de la Madalena- llevantada polos vecinos nos años cuarenta, aprovechando las piedras d'un antiguu edificiu derruíu. Al leste, dous picos -conocíos colos nomes de Picu l'Águila ya'l Picu Nolín- tán lligaos a llendas d'antiguos tesouros, igual relacionaos con enterramientos tumulares, que fonon estudiaos nel sou día pol arqueólogu José Manuel González.

El Picu Nolín ta situáu más a la drecha, detrás de las últimas casas del pueblu, distinguiéndose pola sou forma cónica; tovía perdura la creencia de qu'existe una capilla nel sou interior, comunicada subterráneamente, por debaxo d'El Valle, con unas cuevas qu'hai nel ríu Nalón, cerca de San Román de Candamu. Bellas historias estas, qu'incitarán al viaxeru a deixar llibre la sou imaxinación nun mundu como l'actual cada vez más aferráu a las realidades cotidianas.

La carretera que sube a La Mafalla sigue, bordiando'l Picu l'Águila, ou de La Matiella como tamién se conoz, hasta Las Pandiellas, entroncáu cola AS-315 que conecta Santusesu con La Peral, nel vecín conceyu d'Illas. En mediu del camín ta'l caseríu de Las Paciones, perteneciente a la parroquia de Ventosa.

Pa siguir la nuesa ruta haiq eu baxar, pola mesma carretera, de nuevo a Ventosa, siguiendo pola As-237 hasta La Reigada.  Dende l'altu de La Reigada, menos de cinco quilómetros nos separan del área recreativa de La Degollada, unu de los principales atractivos del conceyu candamín. Parte la carretera detrás del restaurante, discurriendo pola pica de la Sierra del Pedrouzu. En tol trayectu l'accesu ta perfectamente señalizáu.

Esta instalación foi concebida -al igual qu'outras repartidas pola xeografía asturiana- pa ofrecer a los ciudadanos un sitiu que permita disfrutar del entornu natural, disponiendo al mesmu tiempu de los servicios necesarios, de tal forma que l'usu d'estos evite l'habitual deterioru del mediu nas zonas llibres.  Executada pola Alministración Autonómica, ta ubicada nun guapu pinar con espacios abiertos, disponiendo de fontes d'augua potable, parrillas ya mesas. Abundantes pistas ya caminos circundan l'área recreativa, pudiendo practicar nellas tanto'l senderismu como'l mountain-bike. Sitiu esti ideal pa gozar d'una agradable xornada practicando deporte, conviviendo cola naturaleza ya preparando una suculenta comida familiar, degustada al calor de las barbacoas.