Pa conocer el sur del conceyu vamos faer una ruta empezando na capital del conceyu, tomando la carretera AS-237 en dirección a Grau.

 Una vez en puente de Sandiche, antes de cruzallu, proseguiremos pola AS-235 hasta'l pueblu de Murias.

Ubicáu nuna amplia vuelta del ríu Nalón, onde esti recibe las auguas del Dele, apaez Murias, escalonáu na llomba que zarra'l valle; nél destaca la espadaña de la ilesia parroquial de Santa María, de la que se tienen noticias yá en 1.073, fecha na que foi donada a la catedral d'Uviéu. Nada queda del antiguu edificiu, probablemente románicu ou prerrománicu, siendo la construcción actual -d'ábside cuadráu ya nave única, con arcos ya ventanas de mediu puntu- de finales del sieglu XVIII ou principios del XIX.

Llugar nel que tuvieron importancia los molinos fariñeiros, tovía conserva tres d'ellos, dous na llamada Casa de Los Molinos ya outru en Casa de César.

Dende Murias, tres quilómetros n'ascensu sepárannos de Güíles, por una carretera que bordea l'estrechu valle del ríu Dele. Tanto na subida, como dende'l caseríu de Las Cárquivas ya nel propiu Güíles, las panorámicas son mui guapas. Completan la visita a esti poucu conocíu pueblu, inmemoriales horros ya dalgún antiguu fornu.

Nuevamente en Murias, hai que siguir l'AS-235 camín d'Augüera, accediendo al pueblu pola entrada qu'hai al llau de la parada d'autobuses.

Dende Augüera una pronunciada subida llévanos, por Figaréu ya El Caleyu, a Villar;  nesti vamos poder contemplar una de las meyores panorámicas del conceyu. Un pequeñu promontoriu, situáu enfrente al pueblu de Villar, yá conocíu como La Pica de Castru; nome qu'alude a l'antigua ubicación en dichu llugar d'un castru.

De vuelta a Augüera, hai que garrar ente El Caleyu ya Figaréu, la esviación a la esquierda, deixando la parroquia de Murias ya entrando na de Cueru.

Tuvo en Cueru'l sou palaciu la ilustre familia de los Flórez Valdez, con raza nel conceyu de Somiedu. Ensin el esplendor d'antaño, nas sous piedras s'aprecia l'inexorable pasu del tiempu, así como las socesivas reformas que sufriíu. Conocíu en pueblu como Casa de Don Fernando alcuéntrase nun preciosu rincón al llau d'una mui antigua panera.

 El palaciu, de dous plantas, tien una forma rectangular, prolongada pola drecha nuna paré que zarra l'amplia finca colindante. Lo más interesante del conxuntu -ensin duda- yá la guapa capiya del llateral esquierdu, construyida con mui bien trabayaos sillares ya presentáu nuna guapa portada, con frontón partíu ya escudu de la familia nel tímpanu; apaez rematada por una espadaña, pudiendo fechase ente los sieglos XVII ya XVIII, dientro del estilu barrocu.

Tiene tamién el sou interés la ilesia parroquial de San Nicolás de Bari, construiyda en 1.884 ya ubicada nun espaciu de singular encantu, nel pequeñu cementeriu ya la semicircular bancada de piedra, dende la que s'abre a los nuesos güeyos La Veiga de Grau, cola sou villa al fondu.

Siguiendo pola AS-235 llegamos a La Ponte Peñaflor,  pueblu situáu nos alredores de la ponte del mesmu nome. De las últimas casas de La Ponte Peñaflor, una estrecha carretera llévanos, pol pueblu d'El Campillín, hasta l'área recreativa de La Degollada, al traviés de la Sierra del Pedrousu.

A partir de La Ponte Peñaflor, dous posibilidades pa siguir la nuesa ruta: volver, pola AS-235, a la ponte de Sandiche ou cruzar la ponte y dirixinos, pola N-634, a Grau, pa dende ellí, pola As- 237, entrar en Candamu por Villamarín.

En dambos casos llegamos a Sandiche, pequeñu llugar de la parroquia de Murias situáu nel marxe esquierdu del ríu Nalón. En Sandiche hai que deixar l'AS-237 pa garrar la carretera local CD-2, dirección Aces, consideráu esti como unu de los pueblos d'Asturias que más horros alberga, de gran antigüedá la mayoría ya con munchos grabaos nas puertas.

Fala Prieto Bances del bon númbero de texedores qu'antiguamente había n'Aces, que la iglesia parroquial de Santiagu pertenecéu a la reina Velasquita, quien en 1.006 la donóu al bispu Ponce d'Uviéu. L'actual construcción yá del sieglu XIX, anque reconstruyida después de la Guerra Civil.

Continúa la carretera hacia Ferreras, xunto a la ponte de San Román. Ellí conecta cola AS-38 que nos va llevar a San Tisu.

Hai en San Tisu dous nobles casonas que pertenecieron a notables familias de la comarca. La primer d'ellas, conocida como Casa de los Cuervo, vese dende la intersección de las carreteras AS-38 ya As-39. Edificiu rectangular arrodiáu por dellos horros, palombar ya una pequeña capiya.

La segunda de las nobles casas, de los Casares, alcuéntrase na carretera AS-38 que lleva a Outeiru. Mui bien conservada, tien dous pisos con balcones de fierru forxáu ya blasón na fachada. Los sous propietarios punxeron en marcha una orixinal iniciativa turística: el paintball ou xuegu de la guerra, práctica recreativa na que los participantes faen un simulacru de la batalla al aire libre, disparando con inocuas balas de pintura.

Nel interior del pueblu alcuéntrase la ilesia parroquial dedicada a San Tisu. Yá del sieglu XVIII, llevantándose nel llugar qu'ocupóu un antiguo monasterio románico.

Tamién pertenecen a la parroquia de San Tisu, Villa ya Outeiru. A Villa, llégase por una esviación dende l'AS-39, ya a Outeiru pola AS-38, accediendo ellí a la AS-312 pa subir a La Mortera, onde hai censáu un castru: El Castiellu.

 Tien La Mortera una pequeña ilesia que sustituyíu a la esbarrumbada ermita dedicada a San Marcos; ellí , arrodiada d'árboles qu'él mesmu plantóu, ta la casa d'unu de los personaxes más populares de Candamu, José Velázquez, conocíu como'l Conde de La Trapa. La sou vida paez arrancada d'una novela d'aventuras: vivíu en dellos países d'América, emprendiendo multitú de negocios nos que consiguíu fortuna, parte de la cual dedicóu a repoblar -con dellas especies arbóreas- más de seiscientas hectáreas de monte, que güei apaecen como modelu a quien visita estos llugares.

Dende las últimas casas del pueblu comienza la baxada a Praúa: deténgase pa contemplar la guapa ya espectacular vista que, dende l'altu, ofrezse del conceyu.

 Praúa, puntu final de la nuesa ruta, sorpréndenos cola guapura de la sou pequeña ilesia de San Andrés, con ábside cuadráu ya nave única, precedida d'un vestíbulu pelláu; la espadaña presenta tres arcos -unu debaxo ya dous arriba- lo que-y da un orixinal aspectu. Nesta parroquia ta ubicáu'l tercer castru del conceyu.