Con puntu de partida en San Román, una ruta pol noroccidente del conceyu, va permitir descubrir interesantes sitios.

Comenzando na estación de ferrocarril ya siguiendo la AS-236 en dirección a Pravia, bien llueu entramos na parroquia de Fenoeda.

La carretera va paralela al marxe drechu del ríu Nalón, nuna zona d'esti que foi famosa antiguamente pola abondancia de salmones ya llampreas, oxetu d'un repartu sorprendente: la decimoquinta parte pertenecía a la ilesia de Fenoeda, qu'a la sou vez yera distribuyida ente'l cura párrocu, el conventu de monxas de San Pelayu d'Uviéu y el de monxes benedictinos de Corniana, nel conceyu de Salas.

Tres d'una curtia subida, llegamos a Santosesu, onde se collechan las meyores fresas del conceyu, non en vanu los sous vecinos suelen ganar casi tolos premios nel festival qu'añalmente se celebra en Grullos. Nel centru del llugar ta la Capiya de Nuesa Señora, construyida en 1.800 a espensas de Doña Antonia Cuervo, tal como nos recuerda la placa de la fachada. Al llau de la capiya puede contemplase un exemplu etnográficu de panera con corredor ya arcu, comunicando esti, por cima la cai col patiu.

Nel cruz de carreteras de Santosesu l'AS-236 sigue hasta Beifar, llugar que tien casas que repartidas ente los conceyos de Candamu ya Pravia. Pa siguir la nuesa ruta, hai que volver de Beifar a Santosesu, garrando nel cruz l'AS-315 en dirección a La Peral.

Ente campos de fresas allárgase'l caseríu del llugar de Fenoeda hasta la ilesia parroquial de Santa María, con estructura de torre cuadrada ya cubierta piramidal. Sustituyíu a outra más antigua ubicada na parte baxa de Fenoeda, con restos tovía visibles, ente los bardiales, nel sendeiru que dende Santosesu llega a Espinosa, llugar que, situáu al outru llau d'El Regueirón, cuntóu con dellos molinos, güei en desusu; accédese a él en vehículu por una desviación na carretera que dende San Román conduz a la cueva de La Peña.

Dende Fenoeda discurre la carretera en sigue la subida hasta Valdemora. D'ella sal, nuna zarrada curva a la esquierda, l'AS-316 que comunica col conceyu de Sotu'l Barcu ya qu'hai que garrar pa conocer los llugares de Ricabu ya Fontebona.  Dende ellos podremos contemplar una escelente panorámica de la desembocadura del Nalón, ente San Esteban ya L'Arena. Más abaxo, yá na llende con Sotu'l Barcu, alcuéntrase Santa Olaya.

De vuelta a l'AS-315, siguimos hasta Valdemora, llugar que perteneció a l'antigua Casa de los Omaña, familia con amplias posesiones en Llión ya Asturias, pasando llueu a los López Grado. Nel sieglu pasado Manuel Bances compróu'l pueblu ya, dientro del llabor benefactora exercíu pola sou familia en conceyu restituyíulu a los vecinos.

Nel altu ta la capiya de San Nicolás, casi ilesia pol sou tamaño. Nel interior hai una imaxe de la Virxe de Fátima, de la que se cunta esta historia: queriéndola llevar a un pueblu vecín, empezóu a llover de tal manera que tuvieron que devolvella de nuevo a la capilla, momentu nel qu'escamplóu. (Llaves en Casa de Pepe María).

Dende Valdemora puede optase por volver a San Román pol pueblu de Las Parrucas, llugar con casas que se divisan al outru llau del valle.

Continuando la ruta pola carretera AS-315, adientrámonos na parroquia de Ventosa, parroquia que n'outra ruta va ser, de nuevo, oxetu de la nuesa visita. Vamos llegar al caseríu de La Roñada ya, dende ellí, a Tabláu. Nel descensu de la carretera, ente estos dous llugares, segura de que nun vamos resistir la tentación de detener el vehículu pa deleitanos cola escepcional vista que, del últimu tramu del ríu Nalón, obsérvase.

Atravesaremos Tabláu pola estrecha carretera que lo cruza ente las sous casas, ya tenemos d'acercanos a conocer Reznera ya La Rebollada, llugares plenos de sabor rural. Al oeste de Reznera alcuéntrase Los Valles, al que se llega en coche dende La Llamera, perteneciente esta al conceyu de Sotu'l Barcu, porque dende Reznera únicamente yá posible acceder a pía.

De Tabláu hai que siguir hasta la llende del conceyu por Las Pandiellas; na mesma llende L'Argañosa reparte las sous casas ente los conceyos d'Illas ya Candamu, perteneciendo al primeiru la mui cuidada ermita de Santana, onde s'inicia la carretera que conduz a Pulide, pueblu también repartíu, esta vez, ente Candamu ya Castrillón.

Nun hai que perder la ocasión de subir, en Pulide, al mirador, dende onde se divisa tola costa central asturiana n'estraordinaria panorámica. Llugar esti idoneu pa que los amantes de la fotografía puedan disfrutar por completo de la sou afición.

En cruz de caminos qu'hai a la entrada de Pulide, el de la esquierda llévanos a Faéu, pueblu que pertenez por entero a Candamu ya nel que va finalizar la nuesa ruta.

Pa volver, caben dous posibilidades, dambas dende L'Argañosa: volver a San Román pol mesmo camín recorríu, ou siguir hasta La Peral, que pertenez al conceyu d'Illas, pa garrar l'AS-237 que -dirección Grau- llévanos a Grullos.