Dende'l descubrimientu en 1914 de las pinturas ya grabaos de la cueva de Candamu, estas pasanon por dellos problemas de conservación.

La visita indiscriminada ya'l tratu, munchas veces inapropiáu, la deficiente instalación de puntos de lluz ya demás fixenon que'l desastrosu "mal verde" apaeciera. Colonias de felechos, de mufu, d'ocle azul ya verde fonon estendiéndose, sobre too, na Muria de los Grabaos.

El microclima interior no referente a la temperatura, a la humedanza relativa ya a las concentraciones de dióxidu de carbonu foi alterando hasta llograr niveles preocupantes pa la conservación de las pinturas.

En 1980 La Dirección Xeneral de Bellas Artes del Ministeriu de Cultura decide'l piesllu de la cueva ya encarga un estudiu a los Drs. Fortea Pérez, Hoyos Gómez ya Soler Javaloyes conducente a la determinación de las mididas a tomar pal restablecimientu de los valores ambientales de la cueva ya la eliminación del "mal verde".

Hasta 1992 la Caverna de La Peña de Candamu permanez zarrada al públicu ya llogra la regresión completa de las poblaciones de mofu, de plántulas de felechos ya d'ocle, gracias a la eliminación de los puntos de lluz. Nel añu abre esperimentalmente a un grupu diariu de 15 personas por un mes ya n actualidá solo pueden visitar la cueva 25 personas diarias en tres meses al añu.