El panel más importante de la Caverna yá la Muria de los Grabaos au se fixo una complexa composición de figuras.

El primeiru d'ellos, ya'l más complexu, yá la llamada Muria de los Grabaos, d'unos seis metros de llargor por unos ocho d'altor. Nella, por encima del zócalu estalagmíticu de base, alcuéntranse tres grandes agrupaciones ya superposiciones de pinturas ya grabaos, aparentemente xunidas por dalgunas de las figuras aislladas, ya sobre un fondu coloráu natural. Nun yá fácil distinguir munchas de las figuras grabadas sobre la peña. En munchos casos las llinias entemézclanse ya confunden nun enguedeyu de grabaos que faen mui trabayosa la identificación de las representaciones. Tovía más después del grave deterioru sufríu, non tanto pol pasu del tiempu, como pol tratu irracional al que se víu sometida la cueva.

Na parte superior, a la esquierda, alcontramos un primer grupu nel que se ven representaos venaos, bisontes, un rebezu ya una estraña figuración grabada que representa rasgos animales. Nun son mui frecuentes nel arte de los cazadores-recolectores de la prehestoria esti tipu de figuras. Tolas imáxenes d'animales ya l'antropomorfu miran pa la esquierda.

Una cabeza de rebezu sirve de transición al segundu conxuntu, representáu dalgo más abaxo que'l anterior ya llixeramente contra la drecha. Nesti nuevu grupu de figuras alcontramos outra vez representaciones de venaos -unu de los cuales apaez con un venablu claváu nos cuartos traseiros-, una cabra, bóvidos, una figura d'aspectu antropomorfu bestial, col sexu mui marcáu. Un estrañu grabáu sobre la cabeza del gran bóvidu foi interpretáu como una foca. Los animales figuraos nesti conxuntu fonon representaos tanto mirando a la drecha como a la esquierda. Ya dalgunos signos -ente ellos unu en ciszás- entemézclanse con ellos.

Fuera del conxuntu, na parte alta, una cabeza de bóvidu ya una venada pueden ser vistos como figuras de transición contra l'últimu gran conxuntu, nel que volvemos alcontrar dellos bóvidos (ente ellos bisontes), un gran venáu ya caballos, na sou mayor parte mirando contra la esquierda. El gran venáu, orientáu contra la drecha, con venablos atravesándo-y el cuerpu, vuelve la cabeza p'atrás. Tamién se pueden ver dalgunos signos: agrupaciones de puntos ya de llinias.

Por último, na estremidá drecha, llixeramente por encima del conxuntu qu'acabamos de describir, apaez una pequeña agrupación de bóvidos ya signos que se superponen a ellos.

Outros puntos próximos nos qu'alcontramos representaciones, anque menos que sobre la Muria de los Grabaos, son los llamaos Mogote estalagmíticu ya Turria estalagmítica, que s'alcuentran relacionaos topográficamente conla Muria. Nel primeiru d'ellos alcontramos dous cabezas de caballu ya la representación d'una venada, xunto con signos lliniales simples ou agupaos. Na Turria alcuéntrase un caballu grabáu -con trazu múltiple- ya pintáu de color siena, que ta acompañáu por dous signos pintaos en negru.

Las técnicas de representación son variadas: grabaos de llinia simple ya, outros, de trazu múltiple -que sirve de rellenu a las figuras ya pa marcar posibles zonas de sombreáu-, pintura que, colorada, siena ou prieta, yera usada pa contorniar las figuras d'animales ou pa representar los signos. Nun yá infrecuente que grabáu ya pintura s'usen conxuntamente na figuración de dalgunas de las formas animales, como yá'l casu del gran venáu mancáu que vuelve la cabeza.

Queda por citar el conxuntu más espectacular de la cueva: el que ta nel llamáu Camarín. Tienen dalgo de gran retablu barrocu coloáu al fondu del Salón de los Grabaos. Una gran cascada estalagmítica nel altu de la cual una apertura permite descubrir un llenzu de paré nel que s'alcuentran una serie de representaciones de bóvidos ya caballos, non toos ellos igualmente perceptibles. La figura que destaca de manera notable yá la d'un caballu pintáu en color siena, que paez señalar el centru de tol conxuntu. Nuna zona más oculta contra la esquierda del Camarín ta la representación d'una cabra pintada de prietu.