La cuevase abre nun monte pindiu de calizas que dende siempre se llamóu La Peña ya dende'l que se divisa la redolada de Candamu pola que discurre'l ríu Nalón nel sou cursu mediu.

Esti ríu foi na época prehestórica l'eixe sobre'l cual se fixo la vida nas culturas del Paleolíticu Superior de la redolada.

Auténtica llinia de comunicación aglutinóu nel sou entornu ya nel de los cursos fluviales que-y son tributarios las diferentes tribus del momentu qu'en fechas precisas se xuntaban en llugares predeterminaos. Unu d'esos sitios foi la Caverna de La Peña de Candamu na que fixenonlos sous cultos ya rituales relacionaos colos sus mitos que güei nun conocemos pero podemos intuir al traviés de las pinturas ya grabaos.

La cuenca media del ríu Nalón tuvo ampliamente poblada nestas etapas de la Prehestoria ya asina nos alcontramos con dellos sitios nos que se descubrienon cuevas con xacimientu arqueolóuicu, como la Cueva de Sofoxóu (Rañeces), la Cueva de La Palomba (Sotu), la Cueva de la Cruz (Taoces), L'Andina (Taoces), la Cueva Escura (Ania), la Cueva de Les Caldes (Les Caldes, Uviéu) ou cuevas con arte como son la Cueva del Conde (Tuñón), l'Abrigu d'Entrefoces (La Foz, Morcín), la Cueva de Godulfu (Berció), la Cueva de Las Mestas (Priañes), la Cueva de La Lluera I (Priorio), la Cueva de La Lluera III (Priorio), la Cueva d'Entrecueves (Les Segaes), la Cueva de los Murciélagos (La Mazanera), l'Abrigu de La Viña (La Mazanera), l'Abrigu de Santu Adrianu (Tuñón) ya la Cueva de los Torneiros (Tuñón).